Хойд бүсийн аймгууд хөгжлийн тэргүүлэх чиглэлүүдээ Ухаалаг хөдөө аж ахуй, Байгалийн аялал жуулчлал, Аж үйлдвэр гэж тодорхойлсон. Манай улсын хүнс, хөдөө аж ахуйн салбар ажлын байр хамгийн ихээр бий болгодог, эдийн засгийн уламжлалт салбар. 

Тиймээс энэ салбарыг эдийн засгийн үр ашигтай, байгаль орчинд ээлтэй байдлаар хөгжүүлэх нь эдийн засгийн төрөлжилтийг эрчимжүүлж, Тогтвортой хөгжлийн зорилтоо ханган хэрэгжүүлэхэд онцгой чухал ач холбогдолтой гэдгийг Хойд бүсийн зөвлөлийн дарга бөгөөд Булган аймгийн Засаг дарга Д.Пүрэв-Очир онцлов. 

Хойд бүсийн нийгэм, эдийн засгийн онцлох статистикийг танилцуулж байна.
Тус бүсийн Булган, Орхон, Хөвсгөл аймгуудад манай улсын хүн амын 8.9  хувь нь аж төрж байна. Хойд бүсийн хүн амын 49.8 хувь нь эрэгтэй, 50.2 хувь нь эмэгтэй байна. 

Хөдөлмөр эрхлэлтийн оролцооны түвшин 60.2 хувь, ажилгүйдлийн түвшин 6.1, ядуурлын түвшин 29.5 хувь, нэг хүнд ногдох ДНБ 51.8 сая төгрөгт хүрчээ. 

Бүсийн дотоодын нийт бүтээгдэхүүний хэмжээ нь 5.3 их наяд төгрөг бөгөөд үүнээс Орхон аймаг 67.7 хувь буюу 3.5 их наяд, Хөвсгөл аймаг 20.3 хувь буюу 1.0 их наяд, Булган аймаг 12.0 хувь буюу 630.1 тэрбум төгрөгийг бүрдүүлж байна. 
Сарын дундаж цалин 1,7 сая төгрөг байгаа нь Булган аймаг нь бүсийн дундажтай харьцуулахад 19.5 хувь, Хөвсгөл аймаг 25.0 хувиар бага байгаа бол Орхон аймаг 44.5 хувиар их байна.

Хойд бүсийн хэмжээнд 29.6 мянган малчин өрхтэй. 2025 оны жилийн эцсийн мал тооллогын дүнгээр бүсийн хэмжээнд 9.4 сая толгой мал тоологджээ. 

Газар тариалангийн хувьд бүсийн нийт тариалсан талбай 2025 оны байдлаар 83,7 мянган га байна. Үүнээс Булган аймаг 66.6 хувийг, Орхон аймаг 7.3 хувийг, Хөвсгөл аймаг 26.1 хувийг бүрдүүлж байна.