2023 оны дөрвөн сараас эхлэн Эрдэнэт үйлдвэрийн Дулааны цахилгаан станцын дэргэд  Шахмал түлшний хэсгийг байгуулан ажиллаж байгаа билээ. Тус хэсэгт энэ хугацаанд туршилтаар стандартын дагуу 40 орчим тонн шахмал түлш үйлдвэрлээд байна.

             Шахмал түлшний дээжээс авч стандартад нийцэж  байгаа эсэхэд гурван лаборатрит зэрэг шинжилгээнд оруулсан байна. Одоогоор хоёр шинжилгээний хариугаар стандартын шаардлага хангасан гэж үнэлэгджээ.  Агаарын бохирдолтой тэмцэх газрын шинжилгээний хариу хараахан гараагүй байна. Хариу нааштай гарсан тохиолдолд  Эрчим хүчний яамны дэргэдэх Шинжлэх ухаан техникийн зөвлөлд оруулж баталгаажуулан үйлдвэрлэл явуулах зөвшөөрөл авна.

           “Тус хэсэгт одоогоор цагт 10 тонн шахмал түлж үйлдвэрлэх хүчин чадалтай дамжлагыг угсран бэлэн болгосон. Цаашдаа хүчин чадлыг нэмэх боломжтой юм. Шахмал түлш хэвлэгч машинуудыг нэмж суурилуулан, өргөтгөл хийснээр Орхон аймгийн гэр хороололд амьдардаг айл өрхүүдийг шахмал түлшээр хангах боломжтой болох юм” гэж Эрдэнэт үйлдвэрийн Дулааны цахилгаан станцын дарга Г.Мөнх-Эрдэнэ мэдээллээ.