Орхон аймаг болон Эрдэнэт үйлдвэрийн хамтын ажиллагааны хүрээнд энэ жил томоохон бүтээн байгуулалт, хөрөнгө оруулалтын ажлууд хэрэгжиж байна. Тодруулбал, Эрдэнэт үйлдвэр татварынхаа нэг хувийг орон нутагтаа үлдээж, аймгийн хөгжилд чиглэсэн төсөл хөтөлбөрүүдийг санхүүжүүлж эхэлжээ.
Энэ талаар Орхон аймгийн Засаг дарга Б.Зоригтбаяр онцлохдоо “Эрдэнэт үйлдвэртэй хамтран жил бүр гурван тэрбум төгрөгийн хамтын ажиллагааны төлөвлөгөө баталж, хэрэгжүүлэн ажилладаг. Харин энэ жил онцлогтойгоор татварынхаа нэг хувийг Орхон аймагт зарцуулж байна. Энэ бол орон нутгийн хөгжилд чиглэсэн маш том хөрөнгө оруулалт” хэмээн хэллээ.

Тус хөрөнгө оруулалтын хүрээнд уурхайчин хороололд 960 хүүхдийн сургууль, 280 хүүхдийн цэцэрлэг барихын зэрэгцээ хөгжлийн бэрхшээлтэй иргэдийн хөгжлийн төв, цэнгэлдэх хүрээлэнгийн шинэчлэл, Бурхан багшийн сэрэг дүрийн гадна
талбайн засвар зэрэг нийгмийн чиглэлийн бүтээн байгуулалтын ажлууд хийгдэхээр төлөвлөжээ.
Мөн Орхон аймгийн түүхт ойн баярыг тохиолдуулан Эрдэнэт үйлдвэр-ээс 10 тэрбум төгрөгийн дэмжлэг үзүүлж байгаа бөгөөд уг санхүүжилтийг ойн баярын арга хэмжээнд зарцуулахаар төлөвлөжээ.
Түүнчлэн хамтын ажиллагааны төлөвлөгөөнд тусгагдаагүй ч шаардлагатай үед Эрдэнэт үйлдвэр орон нутагт дэмжлэг үзүүлсээр ирсэн байна. Тухайлбал, морь барианы газрын тохижилтын ажилд хүн хүч, техник хэрэгслээр дэмжин ажиллаж байгаа аж.
Аймгийн удирдлагын зүгээс хотын хөгжил, бүтээн байгуулалтын төлөө хамтран ажиллаж буй уурхайчид, баялаг бүтээгчдэд талархал илэрхийлж, цаашид ч хамтын ажиллагаагаа өргөжүүлэн ажиллахаа мэдэгдлээ.