Улсын их хурлын гишүүн Д.Үүрийнтуяа өнөөдөр Орхон аймгийн Баян-Өндөр сумын Говил багт үйл ажиллагаа явуулдаг “Хөгжлийн бэрхшээлтэй хүний хөдөлмөр эрхлэлт, сургалтын төв” ТББ-ын үйл ажиллагаатай танилцаж, үйл ажиллагааны чиглэл, тулгамдаж буй асуудалтай газар дээр нь танилцлаа.

Тус төв нь хөгжлийн бэрхшээлтэй иргэдийн хөдөлмөр эрхлэлтийг дэмжих, мэргэжлийн ур чадвар олгох, нийгмийн оролцоог нэмэгдүүлэх чиглэлээр сургалт зохион байгуулж, тогтмол үйл ажиллагаа явуулж байна. Сургалтад хамрагдагчид гар урлал, үйлчилгээ, үйлдвэрлэлийн чиглэлээр мэдлэг, ур чадвар эзэмшин, бие даан орлого олох боломжийг бүрдүүлж байна.

Тойргоос сонгогдсон гишүүний зүгээс тус төвийн үйл ажиллагааг дэмжих хүрээнд албан хэрэгцээнд шаардлагатай зөөврийн компьютер (ноутбүүк)-ийн асуудлыг шийдвэрлэж, цаашид сургалтын орчин, нөхцөлийг сайжруулах, тоног төхөөрөмжийн хүртээмжийг нэмэгдүүлэх, бүтээгдэхүүн, үйлчилгээний зах зээлийн хүртээмжийг өргөжүүлэх чиглэлээр санал солилцож ажиллав.