Зэсийн зах зээлд инфляцын дарамтаас үүдэлтэй мөнгөний чанга бодлого,  банкны салбарын тогтвортой бус байдал,   зэсийн уул уурхайн нийлүүлэлтийн өсөлт зэрэг хүчин зүйлс голлон нөлөөлж зэсийн үнэ 2023 оны эхэн үетэй харьцуулахад буурч байна.

АНУ-ын  Холбооны Нөөцийн банк инфляцын өсөлттэй холбоотойгоор 2022 оноос хойш зээлийн хүүг тогтвортой өсгөж 5-5,25%  болгосон нь 1971 оноос хойш гараагүй өндөр үзүүлэлт боллоо. Инфляцын дарамт хэвээр үргэлжилж байгаа тул ирэх саруудад АНУ-ын Холбооны Нөөцийн банк дахин бодлогын хүүг өсгөх магадлалтай бөгөөд 2023 оны сүүл гэхэд 5.6%-д хүрнэ гэж шинжээчид үзэж байна.

Зэсийн уул уурхайн салбарт гарсан нийлүүлэлтийн хүндрэлийн асуудал шийдэгдэж нийлүүлэлт сайжирч эхэллээ.  Үүний зэрэгцээ 2023 онд зэсийн уул уурхайн хэд хэдэн төсөл ашиглалтад орж, цар тахал болон бусад шалтгаанаар  2022 онд үйлдвэрлэл нь буурсан уул уурхайн компаниудын үйлдвэрлэл энэ онд өсөх төлөвтэй байна.

2024 оны хувьд зэсийн уул уурхайн үйлдвэрлэл мөн өсөлттэй байх боловч томоохон зэсийн уурхайнуудын хөдөлмөрийн хамтын гэрээний хугацаа 2024 онд дуусаж байгаа тул нийлүүлэлтийн эрсдэл үүсэж болзошгүй ажээ.

  БНХАУ 2023 онд эдийн засгийн өсөлтийг дэмжих төсөл хөтөлбөрүүд хэрэгжүүлэхийг төлөвлөөгүй бөгөөд эдийн засгийн өсөлтийн хэтийн төлөвөө 4,5% буюу судлаачдын  хүлээлтээс доогуур төлөвлөсөн нь тус улсын зэсийн эрэлтийн өсөлтөд сөргөөр нөлөөлж болзошгүй гэж судлаачид үзэж байна.

Харин БНХАУ эдийн засгийн өсөлтийг дэмжих ямар нэг арга хэмжээ авч хэрэгжүүлбэл зэсийн эрэлтийн өсөлтөд эерэг нөлөө үзүүлнэ гэж илтгэгч ярилаа.