Монгол Улсын Ерөнхийлөгчийн тамгын газар, Эрдэнэс Монгол компанийн төлөөлөгчид өнөөдөр Эрдэнэт үйлдвэрт ажиллаж байна. 

    Тэр бум  мод үндэсний хөдөлгөөний хүрээнд Эрдэнэт үйлдвэр зуун сая мод тарихаар амлалт авч төлөвлөгөөний дагуу ажиллаж байгаа талаар Эрдэнэт үйлдвэрийн Ерөнхий захирал Г.Ёндон төлөөлөгчдөд  танилцууллаа. Төлөөлөгчид Ойн генетикийн нөөцийн Эрдэнэт төвийн үйл ажиллагаатай танилцах юм. 

      Эрдэнэт үйлдвэр  нь "Тэрбум  мод тарих" үндэсний хөдөлгөөнийг дэмжин  100 сая модыг 2030 он хүртэлх хугацаанд   тарьж ургуулж,  цаашид арчлан хамгаалахаа төр засаг ард түмнийхээ өмнө нотлон баталгаажуулсан билээ. 

     Иймээс  Ойн генетик нөөцийн “Эрдэнэт” төвийг байгуулсан юм. 1000 тоннын багтаамжтай төв нь 5 агуулахтай.  Модны үр хадгалахаас эхлээд бео технологийн аргаар буюу хуруу шилний мод үржүүлгийн агуулахыг байгуулсан юм.  Тарьцны, суулгацын, шилмүүст болон навчит модны агуулахтайгаас гадна иргэдээс модны үр хүлээн авах тусгай өрөөтэй уг төв нь Монгол улсад анх удаа хийгдсэн Ойн генетикийн нөөцийн төв юм.

           Түүнчлэн нэг сая модны үрийг гурван өдөр суулгадаг Шведийн дэвшилтэт технологийг 100 га талбайд нэвтрүүлснээр жилд гурван удаа тариалалт хийхээр төлөвлөсөн.  Энэ нь мод тарих үйл ажиллагаанд томоохон дэвшил, хувьсал гарна гэдгийг мэргэжлийн хүмүүс мэдээллээ. Дашрамд дуулгахад Шведийн энэ технологийг дэлхийн 80 оронд нэвтрүүлсэн байдаг байна. Монгол улс 81 дэх орон болж ойн хувьсал хийхээр бэлтгэл ажлууд хийгдсээр байна.