100 жилийн өмнө Засагт хан аймгийн нэрийг Хан Тайшир уулын аймаг хэмээн нэрийдэж байлаа. Түүх сөхвөл Засагт хан аймгийн чуулганыг “Хан Тайшир уулын чуулган” хэмээн нэрлэж, засаг захиргааг Алтай, Бигэр сумдын нутагт төвлөрүүлж байсан юм. Иймд Говь-Алтай аймаг бол Засагт хан, Хан Тайшир уулын аймгийн гол цөм газар нутаг байсан учир Монгол Улсын Засгийн газраас Хан Тайшир уулын аймгийн 100 жилийн ойг Говь-Алтай аймагт зохион байгуулахаар тогтсон юм.

Хан Тайшир уулын аймаг байгуулагдсаны 100 жилийн ойн баяр наадмаар нутаг орондоо, ард иргэддээ санал санаачилга, хөдөлмөр, бүтээн байгуулалтаараа танигдсан, Алтай нутгийнхаа нэр хүндийг батлан яваа эрхмүүдийг төр засгаас үнэлж, төрийн одон медалиар шагналаа.

Зуун жилд ганцхан удаа тохиох энэ тэгш ойгоор Монгол Улсын Ерөнхийлөгчийн зарлигаар Говь-Алтай аймгаас Хөдөлмөрийн баатар, Ардын эмч, 11 гавьяат төрж байна. Мөн салбар бүрдээ амжилт гаргасан иргэдээ Алтангадас, Хөдөлмөрийн хүндэт медалиар шагналаа. Та бүхэнд ажил хөдөлмөр, амжилт бүтээл бүхний дээдийг хүсэн ерөөе.