Монгол Улсын Засгийн газраас Монголд зочлох жил болгон зарласантай холбогдуулан Орхон  аймгийн Засаг даргын Тамгын газар, Орхон аймгийн Байгаль орчин аялал жуулчлалын газартай хамтран анх удаагаа уул уурхайн салбарыг сурталчлах зорилгоор  “Зэс фестиваль”-ыг энэ сарын 22,23-нд зохион байгуулах гэж байна. Уул уурхайн салбартаа тэргүүлэгч Эрдэнэт үйлдвэрийн 45 жилийн ой энэ онд тохиож байна. Улсын төсвийн 10 орчим хувийг Эрдэнэт үйлдвэр дангаараа бүрдүүлж байна. Тиймээс улсын төсвийн хөрөнгөөр хийгдэж буй  үйл ажиллагаанд Эрдэнэт үйлдвэрийн хамт олны хүч хөдөлмөр шингэсэн байдаг. 2022 онд  Эрдэнэт үйлдвэрийн хамт олон хоногт улс орон нутгийн төсөвт 4.9 тэрбум төгрөгийг төвлөрүүлсэн бол 2023 оны эхний хагас жилийн байдлаар хоногт 2.4 тэрбум төгрөгийг улс орон нутгийн төсөвт төвлөрүүлээд байна. 2023 оны хүлээгдэж буй гүйцэтгэлээр хоногт 5.4 тэрбум төгрөгийг Улс орон нутгийн төсөвт төвлөрүүлэхээр уурхайчид шамдан ажиллаж байна.