2023 оны 10-р сарын эхний 18 хоногт нэг тонн зэсийн үнэ 8100-7812 ам долларын хооронд хэлбэлзэж дунджаар 7846.5 ам доллар тонн байгаа нь өнгөрөгч есдүгээр сарын дундаж үнэтэй харьцуулахад 424 ам. доллараар буурсан үзүүлэлттэй байна.

Үнэ буурсан шалтгаан нь 10-р сарын эхний долоо хоногт БНХАУ баярын амралттай байсан тул зэсийн үнэ суларч үнэ буурсан байна. БНХАУ-ын засгийн газраас үл хөдлөх хөрөнгийн салбарыг дэмжсэн арга хэмжээ авч хэрэгжүүлж байгаа боловч орон сууцны худалдаа сайнгүй байна.

Liberum Capital-ын судлаач Tom Prise “Хэдийгээр БНХАУ засгийн газар үл хөдлөх хөрөнгийн салбарын эрэлтийг дэмжсэн арга хэмжээ авч хэрэгжүүлж байгаа боловч тус улсын үл хөдлөх хөрөнгийн салбар өсөлт үзүүлэхгүй байгаа нь сүүлийн 20 жилийн туршид гарсан анхны тохиолдол болж байна” гэж мэдэгджээ.

Мөн ам.долларын ханш дахин чангарсан нь зэсийн үнийн өсөлтийг хязгаарлаж байна. Израиль болон Палестины лалын шашинт Хамас бүлэглэлийн хоорондох цэргийн мөргөлдөөн Ойрх Дорнод даяар улс төрийн тодорхойгүй байдлыг бий болгож ам.долларын фунт стерлингтэй харьцах ханш чангарахад нөлөөллөө. Ам.доларын зургаан гол валюттай харьцах ханш 11 өдөр дараалан өсөж байна.

Лондонгийн металлын биржийн зэсийн нөөц 2023 оны эхэн үетэй харьцуулахад 92 хувь, 7-р сарын дунд үетэй харьцуулахад хоёр дахин өсөж 170 мянган тоннд хүрээд байгаа бөгөөд энэ нь 2022 оны 5-р сараас хойш гараагүй өндөр үзүүлэлт юм. Энэ нь зэсийн худалдан авалт сул байгааг харуулж байна гэж эх сурвалжууд мэдээлжээ.

          2023 оны 9-р сард үнийн прогнозоо шинэчлэн гаргасан нийт 29 судалгааны байгууллагын нэг тонн зэсийн үнэ 2023 оны 4-р улирлын үнийн прогноз 7200-9500 ам. долларын хооронд хэлбэлзэж дунджаар 8298 ам.доллар тонн байна.