Өнгөрөгч 7 хоногийн Засгийн газрын хуралдаанаар төрийн өмчит хуулийн этгээдийн хувьцааг олон нийтэд нээлттэй арилжаалах, төрийн эзэмшлийн хувьцааг худалдах, өөрчлөн байгуулах талаар үндсэн чиглэл боловсруулах, төрийн өмчит болон төрийн өмчийн оролцоотой 109 компанийн тоог үе шаттайгаар 20 хувь бууруулж 87 болгох боломжтой талаар хэлэлцсэний зэрэгцээ, Монгол Улсын Ерөнхий сайд Г.Занданшатар холбогдох үүрэг даалгаврыг зохих нэгжүүдэд тус тус өгсөн билээ.

    Ашигт малтмалын тухай хуулийн 5.6-д "Стратегийн ач холбогдол бүхий ашигт малтмалын ордын ашиглалтын тусгай зөвшөөрөл эзэмшиж байгаа этгээд нь хувьцааныхаа 10-аас доошгүй хувийг Монголын хөрөнгийн биржээр арилжина." гэж заасны дагуу  “Монголын хөрөнгийн бирж” ХК-ийн Бизнес хөгжлийн газрын захирал Т.Хаш-Эрдэнэ “Эрдэнэт үйлдвэр” ТӨҮГ-ын Төлөвлөлт, эдийн засгийн шинжилгээний хэлтсийн (ТЭЗШХ) дарга Р.Очбадрах болон IPO гаргах үйл явцыг зохион байгуулахтай холбоотой асуудлаар тус хэлтсийн зарим мэргэжилтнүүдийг хүлээн авч уулзлаа

    Уулзалтад биржийн Бизнес хөгжил хариуцсан ахлах мэргэжилтэн П.Нямдорж, Бүртгэлийн албаны Бүртгэл хариуцсан мэргэжилтэн Г.Амартүвшин нар оролцож, дараах агуулгуудын хүрээнд зохих мэдээллийг өгсөн юм.

   Монголын хөрөнгийн бирж нь 2022 онд төр засгийн холбогдох бодлого шийдвэрийн дагуу IPO гаргаж, нийт хувьцааныхаа 34 хувийг олон нийтэд санал болгон амжилттай арилжсан өөрийн байгууллагын туршлагыг хуваалцлаа.