Монгол Улсын эдийн засгийн суурь, хөгжлийн үндэс нь уул уурхай, эрдэс баялагийн салбар билээ. Эрдэс баялгийн салбарт тогтвортой хөгжил, хариуцлагатай уул уурхайг төлөвшүүлэх, байгаль орчин, нийгэм эдийн засгийн тэнцвэртэй хөгжлийг хангахад салбарынхан харилцан туршлагаасаа хуваалцан, харилцан зөвлөлдөж хэлэлцэх нь чухал. Иймээс эрдэс баялаг, уул уурхайн байгууллагуудын хамтын ажиллагаагаа бэхжүүлэх зорилгоор “Эрдэс баялгийн салбарын тогтвортой хөгжил” өндөр түвшний уулзалтыг Эрдэнэт үйлдвэрт  зохион байгуулж байна.  

Уулзалтыг Аж үйлдвэр эрдэс баялгийн яам, Монголын уул уурхайн үндэсний ассоциаци, Канад улсын уул уурхайн ассоциаци, “Эрдэнэт үйлдвэр” ТӨҮГ хамтран зохион байгуулж байгаагаараа онцлог талтай.

Монгол Улсын тогтвортой хөгжлийн зорилт болон “Алсын хараа 2050”-д эрдэс баялгийн салбараас  оруулах хувь нэмэрийн талаар Аж үйлдвэр Эрдэс баялгийн сайд Г.Дамдинням танилцуулсан бол Дэлхий нийтэд тогтвортой уул уурхай руу шилжих боломжуудыг Канад улсын Уул уурхайн ассоциацийн ерөнхийлөгч Пиеррэ Граттон уулзалтад оролцогчдод танилцуулж мэдээлэл өглөө.

Улсын хэмжээнд  уул  уурхайн салбарыг түүчээлэгч “Эрдэнэт үйлдвэр” ТӨҮГ-ын Ерөнхий захирал Г.Ёндон, МАК ХХК-ийн Бодлогын зөвлөлийн дарга Б.Нямтайшир, , Оюу толгой ХХК-ийн Гүйцэтгэх захирал Дэйрдрэ Лингенфэлдер нар  Монгол Улсад тогтвортой уул уурхайн хөгжилд оруулах хувь нэмэр, тогтвортой хөгжлийн чиг хандлагын талаар танилцуулж санал бодлоо хуваалцахаас гадна  Монгол Улсын зэсийн салбарт тулгамдаж байгаа асуудлуудын талаар хэлэлцэн салбарын урт хугацааны хөгжлийн чиг хандлагыг тодорхойлох юм.