Авто тээврийн цехийн хамт олон өнгөрсөн оны үйлдвэрлэл, эдийн засгийн тайлан балансаа 95,5 хувьтай хамгаалжээ. 2022 онд уулын цул тээвэрлэлт, хүдэр, хөрс тээвэрлэлтийн төлөвлөгөөг тус бүр 101, 1-ээс дээш хувьтай биелүүлсэн байна. Тус хамт олон 2023 онд 29 сая м3 уулын цул тээвэрлэх төлөвлөгөөтэй ажиллаж байна. Үүнтэй холбоотойгоор 2022 оны тодотголоор батлагдсан хүнд даацын өөрөө буулгагч дөрөв, энэ онд батлагдсан зургаа, нийт хүнд даацын өөрөө буулгагч 10 автомашин худалдан авч, угсарч, ашиглалтад оруулах юм.
Энэ нь нийт паркийн 20-25 хувь юм. Эрдэнэт үйлдвэрт ашигладаг өөрөө буулгагч 36 БеЛАЗ автомашины 90 орчим хувь нь камминз хөдөлгүүртэй. Монголд цорын ганц камминсыг төлөөлдөг “Камминс Монголиа” ХХК компанийн удирдлагууд Автотээврийн цехийн энэ төрлийн хөдөлгүүрүүдийн засвар, үйлчилгээ, тоног төхөөрөмжтэй танилцсан юм.
Энэ талаар Авто тээврийн цехийн дарга Я.Дамдиндорж: “Манай Автотээврийн цех камминс хөдөлгүүрийг олон жил засварласан туршлагатай ажилчидтай. Бид өөрсдийн хүчээр Камминс хөдөлгүүрийн засвар, түлшний аппаратур засвар, тахир гол өнгөлгөө, форсункны цэвэрлэгээ засвар, мөн тохиргоо хийдэг.
Түүнчлэн хөдөлгүүрт их засвар хийсний дараа стендээ ашиглан туршиж зүгшрүүлдэг. “Камминс Монголиа” компанийнхан “Ийм цогц засварын газар байгаа нь сайхан боломж” гэсэн. Тэдний удирдлагатай бид хамтран ажиллах санал солилцлоо. Үүний үр дүнд бид шаардлагатай зарим засварт ажилчдаа сургах, тухайн компани манайд хөдөлгүүрийн засварт ажилчдаа дадлагажуулахаар тохиролцсон" гэж мэдээллээ.
Я.Энх
Сэтгэгдэл