АНУ-ын Олон Улсын Хөгжлийн агентлагийн /USAID/ дэд захирал Стийв Уинкейтс, Төрийн өмчийн бодлого зохицуулалтын газрын Төрийн өмчийн удирдлага, зохицуулалтын хэлтсийн Төлөвлөлт, хөрөнгө оруулалтын албаны дарга Ц.Шинэхүү, Захиргаа удирдлагын хэлтсийн Гадаад харилцаа, орон нутаг хариуцсан мэргэжилтэн У.Усгал нартай 2023 оны 6 дугаар сарын 9-ний өдөр уулзаж, хамтын ажиллагаа тогтоох талаар санал солилцов. 

        Төрийн өмчийн бодлого, зохицуулалтын газрын зүгээс дараах чиглэлийн хүрээнд харилцан ойлголцлын санамж бичиг байгуулах хүсэлттэй буйгаа илэрхийллээ. Үүнд;

    Хүний нөөц, боловсон хүчний мэргэжлийн сургалт, ялангуяа төрийн өмчит компаниудын төлөөлөн удирдах зөвлөлийн гишүүд, гүйцэтгэх удирдлагад зориулсан компанийн засаглалын сургалтыг үе шаттайгаар үргэлжлүүлж, бусад шинэлэг чиглэлээр сургах; 

                 
     Төрийн өмчит компаниудын төрийн мэдлийн хувьцааг нээлттэй худалдах, биржээр дамжуулан олон нийтийн хяналтад шилжүүлэх, хувийн хэвшлийн оролцоог дэмжих талаар туршлага солилцох;

    Төрийн өмчит компаниудын засаглал, үр өгөөжийг сайжруулах, нийгмийн хариуцлагыг дээшлүүлэх чиглэлээр АНУ-ын сайн туршлагаас нэвтрүүлэх;
 
        АНУ-ын Олон Улсын Хөгжлийн агентлаг /USAID/ нь хуучнаар Засгийн газрын өмч хувьчлалын комисс, Төрийн өмчийн хорооны үед буюу 1991-ээс 2006 он хүртэлх хугацаанд төрийн өмчийн харилцааны чиглэлд тухайлбал өмч хувьчлал, компанийн засаглалын олон төсөл хөтөлбөр хэрэгжүүлж, хамтран ажиллаж байсан.  

       Уулзалтын үеэр тус байгууллагын зүгээс хуучин хамтын ажиллагааны туршлага дээр үндэслэж, хамтран ажиллах бүрэн дүүрэн боломж бололцоотой гэдгээ мэдэгдсэн юм.