Эрдэнэт үйлдвэрийн хамт олон оны эхний хагас жилийн үйл ажиллагааны тайлангийн хурлаа хийж үйлдвэрлэлийн төлөвлөгөөт үзүүлэлтүүдээ биелүүлэн Улс орныхоо  эдийн засагт  үнэтэй хувь нэмрээ оруулсаар байна.

         “Эрдэнэт үйлдвэр” ТӨҮГ-ын Ерөнхий захирал Г.Ёндон:  Эрдэнэт үйлдвэрийг 2031 он хүртэл хөгжүүлэх үндсэн чиглэлийн хүрээнд хүдрийн нөөцийг өсгөх, үйлдвэрлэлийн тасралтгүй үйл ажиллагаа, улсын төсөв бүрдүүлэлтийг алдагдуулахгүйгээр техник, технологийн шинэчлэл, үйлдвэрлэлийн хүчин чадлыг өргөтгөх, нэмэгдүүлэх, нэмүү өртөг шингэсэн бүтээгдэхүүн үйлдвэрлэх төсөл, бүтээн байгуулалтууд амжилттай хийгдэж байна.

Тухайлбал, энэ оны эхний хагас жилд Баяжуулах үйлдвэрийн Нунтаглан баяжуулах хэсгийн Хам баяжуулалтын 2, 3 дугаар секцийн шинэчлэлийг ашиглалтад өгөхөд бэлэн болгоод байна. Хүдэр бэлтгэлийн 1 дүгээр шугамын шинэчлэл, өргөтгөлийн ажлыг эхлүүлээд  байна.  Уул уурхайн салбарын бодлогын хүрээнд Эрдэнэт үйлдвэр боловсруулалт, борлуулалт, хуваарилалт зэрэгт  онцгой анхаарснаар тодорхой үр дүнд хүрлээ.  Эрдэнэт үйлдвэр өнгөрсөн жил геологи хайгуулын нөөцөө 3.4 тэрбум тоннд хүргэж, батлуулсан. Энэ нь 55 жил үр ашигтай ажиллах нөөцтэй гэсэн үг.  Боловсруулалтын тухайд, жилд 40 сая тонн хүдэр боловсруулж, цаашид катодын зэс, эцсийн бүтээгдэхүүн үйлдвэрлэх төлөвлөгөө боловсруулан ажиллаж байна” гэлээ.