Аж үйлдвэр, эрдэс баялгийн яам, НҮБ-ын Хөгжлийн хөтөлбөр, Олборлох үйлдвэрлэлийн ил тод байдлын санаачилгын Ажлын албанаас хуулийн этгээдийн авлигаас сэргийлэх мэдлэг олгох сургалтыг зохион байгууллаа.
 Сургалтад Монголын Уул уурхайн Үндэсний Ассоциацийн гүйцэтгэх захирал Г.Эрдэнэтуяа оролцож, уул уурхайн салбарт авлигын эрсдэлээс урьдчилан сэргийлэх чиглэлээр танилцуулга хийлээ. Тэрээр "Хариуцлагатай уул уурхайн кодекс  болон Тогтвортой уул уурхайн төлөө  стандартыг онцолсон юм. 
Уг стандарт нь уул уурхайн үйл ажиллагаанд хариуцлагатай, тогтвортой хөгжлийн зарчмуудыг нэвтрүүлэх цогц тогтолцоо бөгөөд компанийн сайн засаглал, ил тод байдал, авлигын эсрэг бодлого, хямралын менежмент болон мэдээлэл, харилцааны төлөвлөгөөтэй байх шалгуурууд тусгагдсан байдаг. Тиймээс компаниуд стандартыг хэрэгжүүлснээр авлигын эрсдэлийг бууруулах боломжтой" гэж мэдээллээ. 

Мөн зөвшөөрөл, лиценз, хяналт шалгалтын давхардал, ханган нийлүүлэлт, худалдан авалт зэрэг нь авлигын эрсдэл дагуулах хүчин зүйлс хэдий ч компаниуд кодекс, стандартаа хэрэгжүүлж, сайн туршлага нэвтрүүлснээр урьдчилан сэргийлэх боломжтой гэлээ. Тодруулбал “Эрдэнэт үйлдвэр” ТӨҮГ тендерийн шалгаруулалтын үйл ажиллагаандаа    хиймэл оюун ухаан ашиглаж эхэлснийг онцоллоо.