Олон жилийн насжилттай мод тарихын тулд модны үр боловсруулах, хөрс шорооны ажлаас эхэлдэг. Иймээс Говил багт байрлах Махны зоорийг Ойн генетик нөөцийн “Эрдэнэт” төв болгон Монгол Улсад анх удаа мод үржүүлгийн нөөц сантай болсон билээ. Ингэснээр модны үр бэлтгэх, модны мөчрөө зөв бэлдэж, хадгалах боломжтой болсон юм.

Энэ ажлыг Эрдэнэт үйлдвэрийн Ногоон хөгжил төслийн хамт олон хариуцан ажиллаж өнөөдөр 11 зүйлийн нэг тонн гаруй үрийн нөөцтэй болоод байна.

Тус хамт олон амьдрах чадвар сайтай мод тарихын тулд модыг үрээр нь, мөчрөөр нь зарим хэсэгт суулгацаар тарьж нийтдээ 5 сая мод тариад байна.

Тодруулбал Орхон гол дагуу тарихгүйгээр гурван сая мөчир ургуулаад байна. Үүнийгээ Хангал голын ойролцоо тарихаар бэлтгэл ажилдаа ороод байна. Мөн Баяжуулах үйлдвэрийн Хаягдлын аж ахуйн булинга хадгалах талбайгаас дэгддэг цагаан тоосны дэгдэлтийг бууруулах зорилгоор ногоон зурвас бий болгохоор уг талбайг тойруулан мод тариад байна.

Хаягдлын аж ахуйн булинга хадгалах талбайн 34.3 га газарт зургаан зүйл ургамлын 2160000 мод тариад байна. 2-3 жилийн дотор ногоон зурвас бүхий байгууламж бий болох тул тарьсан модыг хайрлаж, хамгаалах хэрэгтэй гэж үзэн Баяжуулах үйлдвэрийн хамт олонд хариуцуулан хүлээлгэж өглөө.

Өнөөдрийн байдлаар модны ургалт 80-90 хувьтай байна. Гэвч улиасны төслөөр нийлүүлэгдсэн мөчир огт ургаагүй байна. Улиас модыг тарих, ургах хугацаа тохироо нь бүрдээгүй учир мөчир ургаагүй гэж мэргэжлийн хүмүүс үзэж байна.

Иймээс аливаа модны тарьц суулгахдаа тарьдаг хугацаанд нь мэргэжлийн хүмүүсээс зөвлөгөө авч, мэргэжлийн байгууллагуудтай харьцаж ажиллах хэрэгтэйг сануулж байна. Энэ ч утгаар Монголдаа анх удаа байгуулагдсан Ойн генетик нөөцийн “Эрдэнэт” төвийг зорих аж ахуйн нэгж, байгууллагуудын цуваа тасралтгүй үргэлжилж, модыг зөв тарих аргад ард иргэд байгууллага, аж ахуйн нэгжүүд анхааран суралцсаар байна.

Мэдээллийн дэлгэрэнгүйг Эрдэнэт үйлдвэрийн Ногоон хөгжлийн төслийн мэргэжилтэн, доктор Я.Ариунзулаас тодрууллаа.